Dyma ganolfan ddiwylliannol, fywiog yng nghanol tref Caerfyrddin sy’n cynnig amrywiaeth o weithgareddau ac adnoddau. Ers iddo agor fis Awst, mae Caffi’r Atom eisoes yn hynod o boblogaidd ac yn cynnig brecwast a chinio blasus. Yn enwog am ei ysgytlaeth a siocled poeth anferthol, mae’r caffi ar agor o 9 tan 16:30, dydd Llun i ddydd Sadwrn.
Ar y llawr uchaf, sef Y Gofod, mae lolfa gyfforddus braf gyda sawl soffa ledr, cadeiriau esmwyth a sachau eistedd. Mae sgrin fawr ar y wal i wylio gemau, ffilmiau
neu deledu neu ar gyfer chwarae gemau cyfrifiadurol. Mae cornel i astudio yng nghefn yr ystafell.
Dyma gartref Menter Gorllewin Sir Gâr a stiwdio radio – Cymru FM.
Mae modd cynnal cyngherddau ac amrywiol adloniant yn Y Gofod yn ogystal â llawr gwaelod Yr Atom.
Y tu ôl i’r caffi mae’r Ganolfan Gymraeg. Yma, mae saith ystafell ar gael i’w llogi. Enwau cymeriadau Llyfr Du Caerfyrddin sydd ar yr ystafelloedd.
Mae dwy ystafell gyfarfod, Taliesin a Glewlwyd Gafaelfawr, ac Ystafell Mynach sy’n addas ar gyfer gwaith swyddfa neu gyfarfod ar gyfer hyd at 4 o bobl.
Mae Caffi’r Atom yn medru cynnig bwydlen ar gyfer yr hwyr neu frechdanau a bwffe yn ystod cyfarfodydd.
Mae cegin ar y llawr gwaelod.
Mae Ystafell Myrddin yn gartref i Gylch Meithrin Myrddin yn y boreau, ac mae modd llogi’r ystafell yn y prynhawn neu ei chyfuno ag ystafelloedd Pryderi ac Arthur.
Mae ystafelloedd Pryderi ac Arthur yn addas ar gyfer cynadleddau.
